Takimi Basha-Osmani, “thumba” për Ramën lidhur me dënimin e genocidit serb dhe tarifën në rrugën e Kombit

Kryetari i Partisë Demokratike, Lulzim Basha, ka zhvilluar një takim me Presidenten në detyrë të Kosovës, Vjosa Osmani, në selinë e PD-së.

Në konferencën për mediat, Basha u zotua, se kur PD të jetë në pushtet, do të ketë një rezolutë që dënon genocidin serb në Kosovë. Gjithashtu ai deklaroi se do të hiqet trau në Rrugën e Kombit.

“Do të vazhdojmë të mbështesim fuqishëm dialogun Serbi-Kosovë ku pa dyshim qëllimi është njohja e ndërsjelltë e shteteve dhe hapja e rrugës së integrimit evropian. Dhe kjo më sjell tek çështja e dytë që diskutuam, tek nevoja për të eliminuar barrierat zyrtare dhe jozyrtare që vazhdojnë të pengojnë integrimin ekonomik midis dy vendeve dhe një nga vendimet e mia të para si kryeministër do të jetë heqja e traut në Rrugën e Kombit dhe asnjë pengesë tarifore“, tha Basha.

Edhe Vjosa Osmani, foli për nevojën e një rezolute që dënon genocidin serb në Kosovë dhe gjithashtu barrierat që pengojnë integrimin ekonomik të vendeve.

Gjatë fjalës së Bashës dhe Osmanit, vihej re se një pjesë e mirë e deklaratave, tregonin kontrastin e qëndrimeve mes tyre dhe Edi Ramës.

Basha gjithashtu u zotua për mbështetje të plotë të institucioneve të Kosovës, me ndërrimin e pushtetit.

“Ky është minimumi natyrisht duke pasur parasysh gjendjen e dy vendeve tona dhe obligimin ndaj të rinje dhe e dimë se ardhmja ka fytyrën e rinisë së Shqipërisë dhe të Kosovë. Ndaj do të bëjmë gjithçka për të forcuar ekonomitë tona dhe rikthyer shpresën dhe besimin e qytetarëve për të rindërtuar jetën.

Dhe çështja e tretë që diskutuam është se Shqipëria dhe Kosova i kanë të gjitha potencialet e lidershipit politik për të luftuar kundër korrupsionit dhe kapjes së shtetit.

Dua të shpreh mirënjohje e thellë për mesazhet e qarta dhe pa ekuivoke të znj. Osmani shprehur edhe gjatë ditës së djeshme dhe të siguroj popullin e Kosovës e si kryetar i opozitës dhe nesër si drejtues dhe nip i Kosovës se duhet ta dini se shumë shpejt do të keni fuqinë e plotë të mendjes së Shqipërisë në krahun e Kosovës”, tha ai.