Një 25-vjeçar ka humbur jetën mëngjesin e ditës së mërkurë, rreth orës 06:20 në aksin rrugor Fier-Patos, në vendin e quajtur Portez. Makina e Klement Bashës u përplas me një kamion të tonazhit të rëndë, që drejtohej nga një person i identifikuar si Bardh Spahia.
Kjo ngjarje e rëndë u rikthye në vëmendje nga emisioni “Shqipëria Live”, ku në një lidhje të drejtpërdrejtë ishte motra e të ndjerit, Entela Basha.
Kjo e fundit me lot në sy, tregoi se vëllai i saj, i cili punonte si infermier e bënte çdo ditë atë rrugë.
Entela tregon se e ka marrë një person i njohur në telefon herët në mëngjes për t’i thënë për aksidentin.
“E kishin parë që ishte makina e vëllait. I marr në telefon të shtëpisë dhe vëllain dhe nuk më përgjigjej njeri.
Shkoj tek urgjenca dhe trupin e kishin dërguar në morg. Nuk na thoshte askush se çfarë kishte ndodhur.
Pastaj kam shkuar te vendi i ngjarjes e më pas me mamin te morgu”, tha ajo.
E motra e Klementit shtoi se i vëllai shkonte 10 minuta më herët në punë, pasi do zëvendësonte kolegun që ishte në turn. “Vëllai im nuk ka ndërruar jetë nga shpejtësia.
Ajo rrugë ku ka kaluar vëllai ka gjithmonë probleme, është prishur disa herë. Herë pas here ka grumbullimi uji dhe ngrica që është bërë, ka bërë që të ndodhë aksidenti. Tek urgjenca ma mohuan dy herë që Klementi nuk ishte aty.
Por e kuptova vetë. Më katër janar kishte bërë 25 vjeç. Ishte djalë i vetëm dhe fëmija i vogël”, përfundoi e motra.
Discussion about this post