Një avion mallrash, i cili sipas mediave greke dyshohet se kishte ngarkesë me rreth 12 tonë municione, është rrëzuar pranë qytetit të Kavala në Greqinë veriore në mbrëmjen e së shtunës.
Antonov-12 i operuar nga një kompani me bazë në Ukrainë po fluturonte nga Serbia dhe kishte destinacion Jordaninë.
Avioni i llojit Antonov dyshohet se pësoi avari në një prej motorëve dhe kërkoi leje për t’u ulur në aeroportin e Kavalës, por nuk arriti të mbërrinte deri atje, duke marrë flakë që në ajër, për t’u përplasur më pas në tokë.
Ende mbetet e paqartë se sa persona kishte në bord dhe nëse ka të mbijetuar. Mediat greke thonë se në bordin e avionit, mund të kenë qenë 8 persona të cilët kanë vdekur.
Avioni u nis nga Nishi, Serbi për në Amman, Jordani. Nisja u bë rreth orës 18:36 UTC dhe po kalonte detin Egje kur u kthye në drejtim të Greqisë në orën 19:29 dhe vetëm pak orë më vonë u rrëzua në një fushë pranë Kavalës.
“Pyetja kryesore që mbetet deri më tani është se sa i rrezikshëm është materiali luftarak i transportuar nga avioni ushtarak që u rrëzua”, tha prefekti rajonal i Maqedonisë Lindore dhe Thrakisë, Kristos Metios , i cili ndodhet në vendin ku u rrëzua avioni ukrainas me municion ushtarak që ishte nisur nga Serbia.
Burime pranë Shërbimit të Aviacionit Civil (CAA) bëjnë të ditur se piloti i Antonov An-12 ka informuar se avioni ka pësuar një defekt në motor dhe ka kërkuar leje për ulje emergjente, por nuk ka arritur të shkojë në aeroport, pasi zjarri ka rënë në motor në fluturim dhe avioni u rrëzua.
AAC-ja është në pritje të planit të fluturimit edhe nga shërbimi përkatës i Serbisë. Avioni u rrëzua mes fshatrave Antifilippoi dhe Palaiohori, në Eleftheroupoli të Kavallës. Ngarkesa e Antonov fillimisht u klasifikua si “e rrezikshme”. Më vonë u bë e ditur se avioni mbante dymbëdhjetë ton eksploziv.
Shtabi i Zjarrfikësve kërkoi tërheqjen e menjëhershme të të gjitha forcave të Shërbimit Zjarrfikës, si dhe të gjithë atyre që ndodhen pranë zonës rurale të Paleochorit, ku u rrëzua avioni Antonov An-12, siç deklaroi kreu i Mbrojtjes Civile.
