Ronaldo refuzoi çmimin “Lojtari i Vitit”, për respekt të Lewandowskit

Mbrëmjen e djeshme në Emiratet e Bashkuara Arabe janë ndarë çmimet e “Globe Soccer Awards” për futbollistin më të mirë në Botë për vitin 2020. Cristiano Ronaldo mori çmimin si “Lojtari më i mirë i shekullit”, ndërsa sulmuesi i Bayernit, Robert Lewandowski, mori çmimin “Lojtari më i mirë i vitit”, siç kishte bërë para pak ditësh edhe në çmimet e FIFA-s. Çmimin e sulmuesit të Bayernit mund ta kishte fituar Ronaldo, por këtë ka refuzuar ta marrë.

Të paktën kështu raporton “Tuttosport” (gazetë e afërt me Juventusin), e cila shkruan Cristiano Ronaldo dhe agjenti i tij, Jorge Mendes e refuzuan çmimin e lojtarit më të mirë të vitit nga “Globe Soccer Awards”, për shkak se mendonin që Ronaldo e fitoi atë vetëm falë popullaritetit të tij të madh në botë, dhe se atë çmim e meritonte, Robert Lewandowski që kishte sezonin më të mirë në karrierën e tij. Padyshim një gjest për t’u vlerësuar nga Ronaldo.