Mjeku Edvin Prifti flet pas seancës: Rama mund të ketë dhënë urdhër për arrestimin tim

Mjeku kardiolog Edvin Prifti ka akuzuar kryeministrin Edi Rama, se mund të ketë dhënë urdhër për pezullimin e tij.

Në fjalën e tij para gazetarëve, Prifti tha se është për tu shqetësuar fakti që kryeministri ka deklaruar “se jam i arrestuar”, kur në fakt mjeku është vetëm i pezulluar.

“Kjo është një kërkesë që bëri prokurori, që bazohej në faktin e një sasie të ardhurash që u gjendën në shtëpinë time dhe e konsideroi të arsyeshme një ashpërsim të masës në arrest me burg.

Pasi ai e kërkoi këtë, ne paraqitëm gjithë dokumentacionin që këto janë të ardhura të ligjshme nga një kontratë shit-blerje nga një pronë e bashkëshortes time që e ka trashëguar nga prindërit.

Çdo gjë që kam në jetën time e kam konsideruar të ligjshme dhe me punën që kam bërë, pasi kam punuar në qendrat më të mira kërkimore të botës dhe vetëm çmimet që kam marrë arrijnë në 220 mijë euro. Ato lekë të sekuestruara ishin të bashkëshortes dhe nuk e pashë të arsyeshme që për 48 orë t’i depozitoja.

Kam besim se drejtësia mund të funksionojë, por pak orë më parë politikanë, përfshirë edhe kryeministrin thanë që unë jam arrestuar dhe me sa duket unë po shkoj drejt arrestimit. Deklaratat e kryeministrit duhet t’i komentojë i gjithë publiku. Mund të ketë qenë lapsus, por edhe një urdhër për prokurorinë.

Nuk e di nëse është presion, urdhër apo lapsus, këtë do e vërtetojë koha. Unë jam këtu pas një kontributi të jashtëzakonshëm për vendin tim, pasi i gjeta qytetarët duke mbushur “charter-a” për t’u operuar në Turqi.

Unë kam qenë ai që denoncova pandeminë COVID-19, që mbrojta studentët, që kamë dhënë kontributin tim për Shqipërinë. Paratë ishin në shtëpi pas shitjes së pronës nga bashkëshortja ime dhe motra e saj.

Do të blihej një objekt tjetër, që edhe ai do të blihej me “cash”, ndaj menduam që t’i mbanim në shtëpi. Unë pres që të më burgosin, pasi edhe vendimi u tha nga të tjerë”, tha mjeku Prifti.