Kryetari i Partisë Demokratike, Lulzim Basha zhvilloi mesditën e së dielës një takim me studentë të Fakultetit të Ekonomisë me të cilët diskutoi rreth problemeve që ata po hasin nën situatën e pandemisë së COVID-19.
Basha u shpreh se paketa e ndihmës për efektet që shkaktoi pandemia ishte e papërfillshme për shtresat në nevojë. Ai tha se qeveria mund të kishte bërë më shumë për studentët duke mbuluar tërësisht tarifat e studimit. Thënë këtë ai shtoi se sipas opozitës, tarifa mundet të mbulohet tërësisht për familjet me të ardhura nën 64 mijë lekë në muaj dhe gjysmë për ato me më shumë se kaq.
“Tarifat e studimeve janë sa një e pesta e kostos së koncesioneve,” – theksoi Basha duke kritikuar qasjen e qeverisë për projektet me partneritet publik privat, që sipas tij pengojnë konkurrencën dhe dëmtojnë sipërmarrjen.
Kryetari i PD-së më pas prezantoi një pjesë të programit të opozitës që sipas tij parashikon 10 mijë praktika pune të paguar në vit për studentët, program që sipas Bashës kushton “sa një koncesion i qeverisë”.
Gjatë bisedimit me studentët Basha iu rikthye edhe disa pikave të tjera të programit të opozitës, si zotimi për të zhbërë koncesionet abuzive dhe për të luftuar korrupsionin qeveritar. Ai kujtoi propozimin për forcimin e ligjit anti-mafia dhe kalimit në një kontroll të imtësishëm të të gjitha kontratave koncesionare, vendosjes së një takse të sheshtë 9% etj.
Loading ...
Discussion about this post